قبل ما يقفلوا الصندوق ..!!

( اهداء لزهورنا التى تفتحت فى نجع حمادى فى ليلة ميلاد السيد المسيح 2010)

قبل ما يقفلوا الصندوق ..!! Jan092010_yasser_i_ghobrial

بقلم: د. ياسر يوسف غبريال
1 طوبة 1726 للشهداء - 9 يناير 2010 ميلادية

اصحى يا بنى
النهاردة العيد
وآديك لابس اللبس الجديد
ما ترد يا بنى .. فوق
اصحى
اصحى
قبل ما يقفلوا الصندوق ..
------------ --------- --------- --
قالولى يا ولدى كنت جاى
خرجت من الكنيسة وجاى
قوللى طعم الغدر إزاى؟
طعم الموت إزاى ؟
يا ترى قولت آى ؟
ولا مت من سكات
ولدى مات ؟
مات فى ليلة العيد
ولدى يا ناس شهيد ..
شايفك جاى من بعيد
شايل صليب وسعيد
بس قلبى محروق
وانت هنا قدامى
جوا صندوق
------------ --------- --------- --
يا ابن عمرى
إتسرق العمر منى ..
سنين أكبر وانمى
وأروى ارض عمرك بدمى
وفى يوم العيد
يتسرق الحلم منى
فينك يا ابنى
------------ --------- --------- --
لسه فاكرة ضحكتك
وبسمتك
ورقتك
واول مرة مشيت
لسه فاكرة خطوتك
ولما اتكلمت
ولما كبرت
وبيك فرحت
لما يوم نجحت
فرح نور دنيتك
ويوم العيد لما نزلت
مكنتش عارفة
انى دى اخر سكتك ..
------------ --------- --------- --
لبسوه البدلة لبسوه
ابنى عريس وبيزفوه
عين امه
سند ابوه
اصحى يا بنى فوق
انا عريس يا اما ؟؟
ايوة يا ولدى ..
بس فى صندوق
------------ --------- --------- --
صليبى يا ولدى تقيل
انا من اليوم ده راحيل
دموعى كما بحر النيل
وحزنى كما الليل
طويل .. طويل
كل جرح فى الدنيا
ممكن يروق
الا انى اشوفك يا نضرى
فى صندوق ..
------------ --------- --------- --
اصحى يا وطن
النهاردة كان العيد
واديك لابس رصاص وحديد
وابنى على بابك شهيد
ما ترد يا وطن .. فوق
اصحى
اصحى
قبل ما يقفلوا الصندوق ..

[i][b] لا تعليق ورب المجد يقول لى النقمة انا اجازى يقول الرب

+ الرب يدافع عنكم و انتم تصمتون +

+ تيقن ان ما وعد به هو قادر ان يفعله +

ربنا ياخد بحقنا و بحق اخواتنا